بعض مما يجول فى الخاطر فى قضية أبو اسماعيل

السلام عليكم ورحمة الله وبركاته

لا بفهم فى قانون ولا جنسيات ولا تزوير اوراق فمش هفتى في دول

هتكلم فى اللى ليا فيه او اللى بيجول فى خاطرى
الشيخ حازم مش معهود عليه الكذب وهو راجل بيتكلم بقال الله وقال الرسول وداعية من زمان ومعملش حاجة تخلينى اقول عليه ان هو المرة دى بيكذب

الشيخ أقسم 3 مرات ان والدته معهاش الجنسة ومقدرش بدا اقول ان الشيخ هيقسم بالله كذبا

مجلس شورى العلماء قعدوا مع الشيخ حازم وطلعوا بيان بدعمهم وترشيحهم ليه ،، ودول ناس وشيوخ أفاضل جدا وأثق فى اختيارهم لشخص الشيخ حازم وانهم رأوا فيه حامل للمشروع إسلامى فعلا

الموضوع فيه لبس كتير من الأول ولما برنامج الحقيقة جابوا شهادة إمام جامع فى أمريكا طلع اصلا راجل شيعى ومعروف كرههم لأهل السنة

زائد ان الشيعى ده قال ان جوز اخت الشيخ هو اللى كلمه وقاله ان هى معاها الجنسبة وجوز اخت الشيخ بعت خطاب بخط ايده ينفى فيه ان ده حصل

وبعد كده طلعوا صورة جواز سفر لواحدة بنفس الاسم ومش محجبة وده كان غباء جدا لان والدة الشيخ اصلا ليها لقاءات وشكلها معروف

بالإضافة للصفحات الداعمة ليه على الفيس بوك اللى بتتهاك

لو هى فعلا معاها الجنسية مكانش ابو اسماعيل عمل كم الدعايا واللقاءات اللى عملها حتى لو كان فى نيته ان هو هيلاعبهم بالقانون ، مش عارف يعنى ان هما برضه ممكن يلاعبوه ويثبتوا كذبه ؟

الشيخ نجح قبل كده فى انتخابات مجلس الشعب ورجعوه سقطوه

اللجنة اللى أصدرت القرار اصلا جهه مش نزيهه بالمرة ومش مستبعد منها اى تزوير عادى يعنى

على هذه الأساسات أرى والله أعلم أن الشيخ حازم صادق وليس بكاذب وأن والدته لا تحمل الجنسية

لكن برضه عندى نفس السؤال اللى بيسأله ناس كتير ليه الشيخ ميطلعش يقطع الألسنة ويطلع الجرين كارد او ما يثبت صحة كلامه قدام الناس والإعلام ؟ لا أدرى الصراحة

كان هذا بعض مما يجول بالخاطر

فى النهاية يااااارب لو هو صادق تنصره وتظهر صدقه لكل الناس ، وإن كان كاذب(وأشك فى ذلك) فحسبنا الله ونعم الوكيل

اللهم أرنا الحق حقا وارزقنا اتباعه وأرنا الباطل باطلا ارزقنا اجتنابه

أحمد باشا … ابنى (ابن اختى) الجديد

السلام عليكم ورحمة الله بركاته

هذا أحمد ابن اختى لديه من العمر اثنى عشر يوما

كائن بريئ لا حول لها ولا قوة

لا أملك عندما أنظر فى وجهه إلا

أن أرسم على وجهي ابتسامة صافية أنسى بها هموم الدنيا

وأشعر براحة نفسية عندما أتتحسس وجهه الناعم الصافى

أتفكر كيف لهذا الحمل الوديع أن يتحمل مشاق الدنيا التى ستذهب به يمينا ويسارا بعد حين

وأتمنى له بأن يحيا فى بلده حياة أفضل حال منا

ثم أفكر فى والديه وكيفية المعاناة التى عانوها حتى ينجبوا هذا الطفل الصغير الذى يعتبرونه مصدر السعادة لهم

وكم الشقاء الذى عاشاه طيلة الأربع سنوات منذ زواجهم حتى الإنجاب

وكيف وضع الله حب الأمومة فى قلب كل بنات حواء رغم كم معاناة الحمل والولادة التى لا تخفى عليهن جميعا

فأدعو بأن يبارك الله لهما فيه ويجلعه قرة عين لهم فى الدارين

وأن يرزق الله كل زوجة مشتاقة بالحمل القريب العاجل

وبهذه المناسبة السعيدة قمت بتغيير شكل المدونة

لم أتعود عليها بعد لكن فى انتظار رأيكم بكل ترحاب

سلام عليكم

الحمد لله

السلام عليكم ورحمة الله وبركاته

فى البداية اسفة ان البوست هيبقى كئيب شوية وطويل شوية بس هو واقع للاسف

لو مش جايلك مزاج تقرا الرغى ممكن تشوف الحديث اللى فى الآخر بس ويكفي

الفترة اللى فاتت دى الواحد كل يوم بيشوف قدامه ابتلاء للناس بأشكال مختلفة وبصور صعبة جدا من ناس قريبة وناس بعيد

المرض فى حد ذاته ابتلاء خصوصا لما يكون حاجة مش سهلة وبتفقدك القدرة على اى حاجة كنت متعود تعملها

لكن الاصعب من المرض ان اللى حواليك ميكونوش حاسين بيك او عندهم جمود قلب ولا مبالاة

فعلا دمى بيتحرق جدا لما اشوف حد تعبان واكتر حد المفروض يكون جمبه هو متخلى عنه

يعنى لما تكون واحدة شايفة مامتها نايمة فى  السرير وتعبانة جدا وتقعد هى بكل تناكة طول النهار قدام التليفزيون وسايبة البيت يضرب يقلب

طب دى قلة ادب وعدم وجود قلب ولا رحمة وعدم تربية عدلة وعدم كل حاجة الصراحة

وواحدة تانية مامتها تتخانق مع باباها تقوم تسيب بنتها تعبانة وبتموت وتروح تغضب عند اهلها

يا ستى اسفة يعنى تولع الخناقات اللى بينك وبين جوزك بس اقعدى شوفى بنتك اللى محتاجاكى

اكبر مشكلة ان الواحد يبقى بيفكر فى نفسه بس ومش مهم اى حاجة تانية .. مش مهم اللى قدامه ده محتاجه اد ايه المهم هو مرتاح فين وازاى

سبحان الله كل واحد فينا هيجى له اليوم اللى هيحتاج فى مساعدة حد جمبه بأى صورة والرسول بيقول والله فى عون العبد ما دام العبد فى عون اخيه

حتى الواحد لو محسبهاش كده اصلا فين القلب والضمير اللى يخليك تشوف انسان بيتألم قدامك ومحتاج مساعدتك وانت تطنشه وتتخلى عنه والمفروض ان هو اقرب الناس ليك امك او ابوك او ابنك

من الحالات اللى فى ناس قريبين منى اليومين دول وفى فترة قصيرة جدا كله ورا بعضه

واحدة تعبانة بيجيلها غيبوبة سكر وفقدت الابصار بعين والتانية ضعفت جدا

والتانية عملت عملية تظبيط فقرات وكانت فاتحة ضهرها وتركيب فقرات تقريبا وحاجات غريبة

واحد حصله صدمه معينه مقدرش يستحملها حصله شبه فقد فى الذاكرة وبقى تعبان نفسيا جدا

جار اختى عنده سنتين توفاه الله

والد واحدة صاحبتى توفاه الله

خال واحدة صاحبتى توفاه الله

زيارة ومرافقة حد مريض فى المستشفى وما ادراكم ما دخول المستشفيات وسماع آهات الناس

وحاجات كتير والدنيا مليانة ابتلاءات

دى الحاجات العادية غير اللى بيحصل فى مصر وان يوصل لاكتر من 100 واحد يموتو فى ماتش وغير اللى بيحصل فى سوريا

بس كل ده يخلى الواحد يقف مع نفسه كتير اوى ويقعد يعد نعم ربنا عليه وده اللى بسببه كتبت الموضوع

مش لشكوى ولا تفريغ شحنه ولا اى حاجة غير ان نفسى نبص حوالينا ومنعديش الامور كده وخلاص

فلان مات ربنا يرحمه ويصبر اهله

فلان تعبان ربنا يشفيه

طب بس كده يعنى ؟

لا طبعا

ده انت تقول فلان تعبان بمرض كذا اللى انا مش مريض بيه وفلان رجله فيها كذا وانا رجلى سليمة وفلان محدش بيسأل عليه وانا الحمد لله عندى اهلى والناس اللى بيحبونى حواليا

فلان معندوش قلب ولا رحمة بخلق الله وانا الحمد لله بتأثر وبحاول اساعد

نعم ربنا علينا محتاجة شكر كتيييير اوى اوى والشكر مش مجرد كلمه

شكر النعمة بجد انك تطيع ربنا بالنعمة دى وتتعبده بيها

الواحد لو قضى عمره كله فى شكر نعم ربنا عليه مش هيوفيه حقه فى الشكر

واحنا بكل ببساطة بنعصى ربنا وبنجهر بالمعصية بالنعمة اللى من علينا بيها ومش بنفكر ان هو قادر بكل يسر انه يسلب مننا النعمة دى

محتاجين بجد نرفق بنفسنا ونرحم أنفسنا

ده انت لو واحد قدملك خدمة بتبقى فى المقابل نفسك تردله الجميل وتستنى اى فرصه … رد بقى جمايل ربنا عليك الكتير التى لا تعد ولا تحصى

ربنا بيقول : وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ (7) سورة إبراهيم

يعنى ربنا وعدنا اننا كل ما نشكر نعمه كل ما هيزيدها

وكذلك ان لو مشكرناش نعمه ممكن تسلب

{وَضَرَبَ اللّهُ مَثَلاً قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللّهِ فَأَذَاقَهَا اللّهُ لِبَاسَ الْجُوعِ وَالْخَوْفِ بِمَا كَانُواْ يَصْنَعُونَ} (112) سورة النحل

النبى عليه الصلاة والسلام لما كان يقوم الليل حتى تورمت قدامه وسألوه ليه بتعمل كده وقد غفر الله لك ما تقدم من ذنبك وما تأخر فقال :” أفلا أكون عبدا شكورا ” فكانت صورة من صور شكر نعم ربنا انه يعبده

لو بصيت مثلا على نعمة البصر .. اشكر ربنا عليه بانك متبصش بعينك على اى حاجة ربنا حرمها من باب شكر النعمة اللى اعطاها لك

لو بصيت على نعمة اللسان والكلام .. اشكر ربنا بانك تجعل لسانك رطب بذكر الله وقراءة القرآن وابعد عن الغيبة وعن قول الاثم والباطل وكل ما يغضب ربنا

وهكذا

اشكر ربنا بإنك تتقيه وتبعد عن كل ما يغضبه .. اشكر ربنا بانك تزيد ورد عباداتك .. اشكر ربنا بانك تتعرف على دينك بصورة اعمق وتطبقه فى حياتك

اشكر ربنا فى كل لحظة فى حياتك وفى كل عمل بتعمله

فى النهاية هختم بحديث هو حلو جدا فيه شكر ربنا بصورة حلوة اوى وهو كنز فعلا اقرأه بتمعن وحاول تخليه ورد يومى ليك لانه فرصة متتعوضش الصراحة

عَنْ أَبِي أُمَامَةَ، قَالَ: رَآنِي النَّبِيُّ صَلَّى اللَّهُ عَلَيْهِ وَسَلَّمَ وَأَنَا أُحَرِّكُ شَفَتَيَّ، فَقَالَ:”مَا تَقُولُ يَا أَبَا أُمَامَةَ؟” قُلْتُ:أَذْكُرُ اللَّهَ، قَالَ: “أَفَلا أَدُلُّكَ عَلَى مَا هُوَ أَكْثَرُ مِنْ ذِكْرِكَ اللَّهَ اللَّيْلَ مَعَ النَّهَارِ؟ تَقُولُ: الْحَمْدُ لِلَّهِ عَدَدَ مَا خَلَقَ، وَالْحَمْدُ لِلَّهِ مِلْءَ مَا خَلَقَ، وَالْحَمْدُ لِلَّهِ عَدَدَ مَا فِي السَّمَاوَاتِ وَمَا فِي الأَرْضِ، وَالْحَمْدُ لِلَّهِ عَدَدَ مَا أَحْصَى كِتَابُهُ، وَالْحَمْدُ لِلَّهِ مِلْءَ مَا أَحْصَى كِتَابُهُ، وَالْحَمْدُ لِلَّهِ عَدَدَ كُلِّ شَيْءٍ، وَالْحَمْدُ لِلَّهِ مِلْءَ كُلِّ شَيْءٍ، وَتُسَبِّحُ اللَّهَ مِثْلَهُنَّ”، ثُمَّ قَالَ: “تُعَلِّمُهُنَّ عَقِبَكَ مِنْ بَعْدَكَ”. أخرجه النسائي (6/50 ، رقم 9994) ، وابن خزيمة (1/371 ، رقم 754) ، والطبراني (8/238 ، رقم 7930) وصححه الألباني (صحيح الجامع، رقم: 2615)

سلام عليكم

عام هجرى جديد 1433

السلام عليكم ورحمة الله وبركاته

حبيت اسلم على البلوج واقولكوا كل سنة وانتو طيبين بمناسبة السنة الهجرية الجديدة

بكرة ان شاء الله اول يوم فى السنة

غرة محرم 1433

ويارب السنة الجديدة تكون فاتحة خير على مصر وكل المسلمين

وبما انها سنة هجرية جديدة فيارب المجلس العسكرى يهاجر بقى ويرحمنا

كل سنة وانتو طيبين

سلام عليكم

انتهاء اول كورس اى سى دى ال اونلاين

السلام عليكم ورحمة الله وبركاته

من فترة كده كنت أعلنت عن انى هدى كورسات اى سى دى ال للبنات فى المنصورة

ففى واحدة طلبت منى انى اديها الكورس اون لاين

بصراحة ترددت شوية وبعدين وافقت وقولت اجرب الموضوع

والحمد لله خلصنا النهاردة كانت آخر سيشن فى الكورس

وانا شخصيا شايفة انها تجربة ناجحة والموضوع مطلعش صعب

يعنى بالنسبة لاسلوب الشرح والفهم كان الموضوع سهل عادى مكانش فى مشاكل

كانت بس المشاكل اللى بتقابلنا فصل النت او ان الجهاز بايظ او ما شابه وغالبا كان بيبقى من عندها

بس انا فرحانة بالتجربة الصراحة جدا

وربنا معاها بقى فى الامتحانات وان شاء الله تجيب درجات حلوة

.

.

email : hend89_icdl@yahoo.com

سلام عليكم

لؤى مش بلطجى … لؤى من الثوار

سلام عليكم

لؤى نجاتى من الثوار اللى كانو فى الميدان امبارح ،،، وكان بيتويت كل حاجة بتحصل من هناك وكنا متابعين معاه على تويتر

وبعدين لؤى  وقف التويت من الساعة 6 الصبح تقريبا

آخر تويت كاتبها لؤى  من 21 ساعة كانت : ومصابين ماتعدش يا مولانا

النهاردة الناس بدأت تسأل على لؤى  ولاحظو ان هو مختفى واصحابه والناس اللى عارفاه دوروا عليه فى الميدان

مكانش ليه أثر واتصلوا بيه تليفونه مقفول وكنا متابعين معاهم على الهاشتاج

#LoaiNagati

وأهله مكانوش عارفين طريقه

لحد ما وصل أخبار ان لؤى  فى النيابه العسكرية هو وتقريبا 40 واحد من الشباب الثوار

ليييييييييييييييييييييييييييييييييييييييييييييييييييييييييييييييييييه؟؟؟؟

اكيد لان هما شايفين ان لؤى بلطجى زى ماقالو على اللى فى الميدان امبارح كلهم بلطجية

هما معنى البلطجى عندهم الشاب النضيف اللى نازل يدافع عن اهالى الشهدا واللى نازل يلغى الفساد ؟

لؤى والشباب مش بلطجية

البلطجية بجد هما بتوع الداخلية اللى كانو بيشتموا امبارح بأبشع الألفاظ فى الميكروفونات وبيضربو الشرفا

البلطجية بجد اللى لسه جايبين قنابل مسيلة للدموع من امريكا الشهر اللى فات

البلطجى بجد هو الظابط اللى كان عمال يرقص بالسيوف

البلطجية بجد هما اللى فى طره اللى احنا منعرفش بيعملوا ايه

البلطجي بجد المخلوع اللى فى شرم اللى محدش بيحاكمه ولا بيكلمه

هما دول البلطجية مش لؤى وزمايله

بس  ربنا هيقف جمبهم عشان هم ناس نيتهم نضيفة وصافية وان شاء الله حقهم وحق الشهدا والمصابين هيرجع

وانتو ربنا هيحاسبكو فى الدنيا قبل الآخره

حسبى الله ونعم الوكيل

بكرة ان شاء الله فى وقفة قدام النيابة العسكرية للتضامن مع لؤى الساعة 10 الصبح

ربنا معاهم يارب

downoad youtube videos @ ubuntu

سلام عليكم

كنت عاوزة ادون فيديو من اليوتيوب وكل المواقع  مكانتش راضية تشتغل معايا

فعملت سيرش ولقيت طريقة سهلة خالص ومفيهاش رخامة

الطريقة ببساطة

اولا :- اكتب الكوماند ده فى الترمينال للتسطيب

Install youtube-dl in Ubuntu

هيطلب الباسورد طبعا ولما تكتبها هيبدأ يعمل انستال

استنى لما يخلص

ثانيا :- عشان تدون بقى فيديو اكتب فى الترمينال

youtube-dl

وجمبيها لينك الفيديو واسنتى وهو هيدونلود الفيديو ولما ينزل هتلاقيه فى الهوم فولدر

مثال :-

youtube-dl http://www.youtube.com/watch?v=XzCcw_KsMQs

بس كده

الطريقة منقولة من هنا

http://www.ubuntugeek.com/howto-download-videos-from-youtube-in-ubuntu.html

سلام عليكم

احنا كمان بنهزر يا ساويرس

السلام عليكم ورحمة الله وبركاته

قام رجل الأعمال المعروف نجيب ساويرس بنشر صورة كاريكاتير لشخصية ميكى وميمى الكارتونية باللحية والنقاب على حسابه على موقع تويتر

فهاجمه الكثير واعتبروه اساءه للاسلام ولمظهر الاسلام وللحية والنقاب

فاضطر أن يقدم اعتذار وأنه لم يكن يقصد ذلك وأننا فقدنا روح الدعابة

والحقيقة أن هذه لم تكن المرة الأولى التى يسئ فيها ساويرس للاسلام فقبل ذلك اساء للحجاب

وللمادة الثانية من الدستور والكثير والكثير

ولكن اليوم كانت هناك ردوداقوية

منها  رد المذيع وسام عبد الوارث فى برنامج مصر الحرة فى قناة الحكمة ورد الشيخ الفاضل محمد عبدالمقصود

واطلقت القناة حملة ضد ساويرس بمقاطعته وكل شركاته

وبادرت القناة بوقف الاتصالات والرسائل من كل خطوط موبينيل

يمكن مشاهدة هذا الفيديو

كذلك كان هناك ردا آخر حيث أَنشأت صفحة على الفيسبوك بعنوان “احناكمان بنهزر يا ساويرس”

وطلبت الصفحة من كل من يمتلك خط موبينيل ان يكسره ويرفع الصورة

وبالفعل شارك العشرات فى تكسير شرائحهم والتعليق الساخر عليها كرد فعل لما فعله ساويرس

صورة لشريحة موبنيل من صندوق القمامة

تكسير يو اس بى موبينيل

لمزيد من الصور الشرائح المكسرة زورالصفحة

http://www.facebook.com/boycott.sawiris

خسوف القمر غدا الأربعاء

السلام عليكم ورحمة الله وبركاته

بسم الله الرحمن الرحيم

“لا الشمس ينبغي لها أن تدرك القمر ولا الليل سابق النهار وكل في فلك يسبحون “

بكرة ان شاء الله فى خسوف قمر كلى فى معظم الدول العربية

هيكون حوالى الساعة 8 بالليل وهيستمر لحوالى 9 يعنى تقريبا ساعة

الخسوف بيبقى فى عظة وتذكير بالموت والآخرة والرسول عليه الصلاة والسلام أحث على صلاة الخسوف

وفيها أحاديث كتير صحيحة منها

عَنْ ابْنِ عُمَرَ رَضِيَ اللَّهُ عَنْهُمَا أَنَّهُ كَانَ يُخْبِرُ عَنْ النَّبيِّ صَلَّى اللَّهُ عَلَيْهِ وَسَلَّمَ

“إِنَّ الشَّمْسَ وَالْقَمَرَ لَا يَخْسِفَانِ لِمَوْتِ أَحَدٍ وَلَا لِحَيَاتِهِ

وَلَكِنَّهُمَا آيَتَانِ مِنْ آيَاتِ اللَّهِ فَإِذَا رَأَيْتُمُوهَا فَصَلُّوا”

رواه البخاري (1402) ومسلم (914).

عن الْمُغِيرَةَ بْنَ شُعْبَةَ قال: انْكَسَفَتْ الشَّمْسُ يَوْمَ مَاتَ إِبْرَاهِيمُ فَقَالَ النَّاس

انْكَسَفَتْ لِمَوْتِ إِبْرَاهِيمَ فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ :

“إِنَّ الشَّمْسَ وَالْقَمَرَ آيَتَانِ مِنْ آيَاتِ اللَّهِ لَا يَنْكَسِفَانِ لِمَوْتِ أَحَدٍ وَلَا لِحَيَاتِهِ فَإِذَا رَأَيْتُمُوهُمَا فَادْعُوا اللَّهَ وَصَلُّوا حَتَّى يَنْجَلِيَ” .

رواه البخاري (1061) ومسلم (915).

وفى أحاديث تانية كتير

منها اللى بيحث على الصلاة وعلى الدعاء وعلى الصدقة وعلى الذكر والاستغفار ولعى التعوذ من القبر

—————-

صلاة الخسوف بتبقى ركعتين جهريتين وفى كل ركعة قراءتان وركوعان وسجودان

وفى من العلماء ومنهم ابن القيم من يقول بوجوبها لفزع النبى صلى الله عليه وسلم عندما رأى الخسوف وذهب ليلصلى ونادى مناد أن الصلاة الجامعة

ومنهم من يقول بأنها سنة

والله أعلم

عَنْ عَائِشَةَ رَضِيَ اللَّهُ عَنْهَا أَنَّ يَهُودِيَّةً …. فَكَسَفَتْ الشَّمْسُ

فَرَجَعَ ضُحًى فَمَرَّ رَسُولُ اللَّهِ صَلَّى اللَّهُ عَلَيْهِ وَسَلَّمَ بَيْنَ ظَهْرَانَيْ الْحُجَرِ

ثُمَّ قَامَ فَصَلَّى وَقَامَ النَّاس وَرَاءَهُ فَقَامَ قِيَامًا طَوِيلًا ثُمَّ رَكَعَ رُكُوعًا طَوِيلًا

ثُمَّ رَفَعَ فَقَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ

ثُمَّ رَفَعَ فَسَجَدَ سُجُودًا طَوِيلًا ثُمَّ قَامَ فَقَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ

ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ ثُمَّ قَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ

ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ ثُمَّ سَجَدَ وَهُوَ دُونَ السُّجُودِ الْأَوَّلِ ثُمَّ انْصَرَفَ” .

متفق عليه – وقد سبق قريباً -.

صفة صلاة الخسوف كما يلي :

ركعتان بأربع ركوعات وأربع سجدات ، يكبر فيقرأ الفاتحة وسورة طويلة ، ثم يركع ركوعاً طويلاً بقدر القراءة ، ثم يرفع ويقول سمع الله لمن حمده ، ربنا ولك الحمد ، ثم يقرأ الفاتحة وسورة طويلة أقصر من التي قبلها ، ثم يركع ركوعاً طويلاً أقصر من الذي قبله ، ثم يرفع قائلاً سمع الله لمن حمده ، ربنا ولك الحمد ، ثم يسجد سجدتين طويلتين بقدر القراءة ، الأولى منهما أطول من التي تليها ، ثم يصلي الركعة الثانية كالأولى ولكن دونها في كل ما يفعل ، دفعاً للحرج والمشقة على الناس ، ومنعاً للضجر والسآمة ، لأن المصلي حينما يدخل الصلاة يكون على قدر كبير من النشاط فما يلبث أن يضمحل هذا النشاط شيئاً فشيئاً ، فناسبذلك أن تكون الصلاة متفاوتة في الطول .

حاولو بقى متضيعوش ثوابها والعظة منها

واللينك ده فى تفصيل كامل عن صلاة الخسوف اللى يحب يعرف عنها معلومات اكتر ،، وايه اللى نقوله فى الركوع والسجود لان بنطول فيهم اوى ومعلومات كتير عن الصلاة وعن الخسوف

http://www.saaid.net/Doat/yahia/12.htm

اللهم احسن خواتيمنا وقنا عذاب النار يارب

سلام عليكم

جريدة اليوم الساقع … حسان: من يتهم المجلس العسكرى بالخيانة كالمرتد بعد وفاة الرسول

السلام عليكم ورحمة الله وبركاته

نشترت بالأمس جريدة اليوم السابع مقالا بعنوان

حسان: من يتهم المجلس العسكرى بالخيانة كالمرتد بعد وفاة الرسول

المقال انتشر جدا على الفيس وعلى تويتر

وطبعا المعظم بينتقد الشيخ جدااااا

الحق يقال ان العنوان مستفز جدا لأى حد يقرأه وانا شخصيا اتصدمت من العنوان واستغربت جدا

فدخلت قريت المقال كامل وقريت الجزء المتعلق بالمجلس العسكرى اكتر من مرة

لعل وعسى الاقى علاقة بين الكلمتين اللى اتقالوا عن المجلس على لسان الشيخ وبين عنوان المقال

لكن هيهات

دول الكلمتين اللى اتذكروا فى المقال عن المجلس

أما ثانى الأمور التى انتقدها حسان هم الذين اتهموا الجيش والمجلس الأعلى للقوات المسلحة بالتباطؤ والخيانة

والذين يريدون إشعال الفتنة الطائفية،

بالإضافة لإعلام الإثارة

وهم كذلك يلبسون الحق بالباطل والصدق بالكذب والخير بالضلال،

ممؤكدا أن الأمر يحتاج إلى بصيرة وعلم بحجم المؤامرة التى تدبر الآن على الإسلام ومصر،

المقال بطوله مفيهوش غير الجزء ده الوحيد المتعلق بالمجلس

اللى انا مش شايفة اى علاقة بينه وبين العنوان ابدا

انا مش هتكلم بقى عن اللى مكتوب فى الجزء ده ،، ده كلام الشيخ من وجهة نظره

انا بس عاوزة اقول ان مالوش علاقة بالعنوان خالص اللى خدع ناس كتير

اساسا يعنى معظم الناس مبتحبش اليوم السابع ومشهورة باسم ايوم الساقع بين الناس كلها

وكل الناس بتكدب اخبارها وتضليلها دايما ومش بيصدقوا اللى بيتقال عليها

لكن لما يتقال عليها حاجة ليها علاقة بالشيخ حسان او السلفيين

تبقى اليوم السابع زى الفل واصدق العنوان من غير ما اقرأ المقال وانا مغمض عنيا صح؟

مش طالبه من الناس غير انهم يقرأوا المقال كامل وميخدوش بالعنوان لان ليس له علاقة بكلام الشيخ اصلا

سلام عليكم