عام هجرى جديد 1433

السلام عليكم ورحمة الله وبركاته

حبيت اسلم على البلوج واقولكوا كل سنة وانتو طيبين بمناسبة السنة الهجرية الجديدة

بكرة ان شاء الله اول يوم فى السنة

غرة محرم 1433

ويارب السنة الجديدة تكون فاتحة خير على مصر وكل المسلمين

وبما انها سنة هجرية جديدة فيارب المجلس العسكرى يهاجر بقى ويرحمنا

كل سنة وانتو طيبين

سلام عليكم

انتهاء اول كورس اى سى دى ال اونلاين

السلام عليكم ورحمة الله وبركاته

من فترة كده كنت أعلنت عن انى هدى كورسات اى سى دى ال للبنات فى المنصورة

ففى واحدة طلبت منى انى اديها الكورس اون لاين

بصراحة ترددت شوية وبعدين وافقت وقولت اجرب الموضوع

والحمد لله خلصنا النهاردة كانت آخر سيشن فى الكورس

وانا شخصيا شايفة انها تجربة ناجحة والموضوع مطلعش صعب

يعنى بالنسبة لاسلوب الشرح والفهم كان الموضوع سهل عادى مكانش فى مشاكل

كانت بس المشاكل اللى بتقابلنا فصل النت او ان الجهاز بايظ او ما شابه وغالبا كان بيبقى من عندها

بس انا فرحانة بالتجربة الصراحة جدا

وربنا معاها بقى فى الامتحانات وان شاء الله تجيب درجات حلوة

.

.

email : hend89_icdl@yahoo.com

سلام عليكم

لؤى مش بلطجى … لؤى من الثوار

سلام عليكم

لؤى نجاتى من الثوار اللى كانو فى الميدان امبارح ،،، وكان بيتويت كل حاجة بتحصل من هناك وكنا متابعين معاه على تويتر

وبعدين لؤى  وقف التويت من الساعة 6 الصبح تقريبا

آخر تويت كاتبها لؤى  من 21 ساعة كانت : ومصابين ماتعدش يا مولانا

النهاردة الناس بدأت تسأل على لؤى  ولاحظو ان هو مختفى واصحابه والناس اللى عارفاه دوروا عليه فى الميدان

مكانش ليه أثر واتصلوا بيه تليفونه مقفول وكنا متابعين معاهم على الهاشتاج

#LoaiNagati

وأهله مكانوش عارفين طريقه

لحد ما وصل أخبار ان لؤى  فى النيابه العسكرية هو وتقريبا 40 واحد من الشباب الثوار

ليييييييييييييييييييييييييييييييييييييييييييييييييييييييييييييييييييه؟؟؟؟

اكيد لان هما شايفين ان لؤى بلطجى زى ماقالو على اللى فى الميدان امبارح كلهم بلطجية

هما معنى البلطجى عندهم الشاب النضيف اللى نازل يدافع عن اهالى الشهدا واللى نازل يلغى الفساد ؟

لؤى والشباب مش بلطجية

البلطجية بجد هما بتوع الداخلية اللى كانو بيشتموا امبارح بأبشع الألفاظ فى الميكروفونات وبيضربو الشرفا

البلطجية بجد اللى لسه جايبين قنابل مسيلة للدموع من امريكا الشهر اللى فات

البلطجى بجد هو الظابط اللى كان عمال يرقص بالسيوف

البلطجية بجد هما اللى فى طره اللى احنا منعرفش بيعملوا ايه

البلطجي بجد المخلوع اللى فى شرم اللى محدش بيحاكمه ولا بيكلمه

هما دول البلطجية مش لؤى وزمايله

بس  ربنا هيقف جمبهم عشان هم ناس نيتهم نضيفة وصافية وان شاء الله حقهم وحق الشهدا والمصابين هيرجع

وانتو ربنا هيحاسبكو فى الدنيا قبل الآخره

حسبى الله ونعم الوكيل

بكرة ان شاء الله فى وقفة قدام النيابة العسكرية للتضامن مع لؤى الساعة 10 الصبح

ربنا معاهم يارب

downoad youtube videos @ ubuntu

سلام عليكم

كنت عاوزة ادون فيديو من اليوتيوب وكل المواقع  مكانتش راضية تشتغل معايا

فعملت سيرش ولقيت طريقة سهلة خالص ومفيهاش رخامة

الطريقة ببساطة

اولا :- اكتب الكوماند ده فى الترمينال للتسطيب

Install youtube-dl in Ubuntu

هيطلب الباسورد طبعا ولما تكتبها هيبدأ يعمل انستال

استنى لما يخلص

ثانيا :- عشان تدون بقى فيديو اكتب فى الترمينال

youtube-dl

وجمبيها لينك الفيديو واسنتى وهو هيدونلود الفيديو ولما ينزل هتلاقيه فى الهوم فولدر

مثال :-

youtube-dl http://www.youtube.com/watch?v=XzCcw_KsMQs

بس كده

الطريقة منقولة من هنا

http://www.ubuntugeek.com/howto-download-videos-from-youtube-in-ubuntu.html

سلام عليكم

احنا كمان بنهزر يا ساويرس

السلام عليكم ورحمة الله وبركاته

قام رجل الأعمال المعروف نجيب ساويرس بنشر صورة كاريكاتير لشخصية ميكى وميمى الكارتونية باللحية والنقاب على حسابه على موقع تويتر

فهاجمه الكثير واعتبروه اساءه للاسلام ولمظهر الاسلام وللحية والنقاب

فاضطر أن يقدم اعتذار وأنه لم يكن يقصد ذلك وأننا فقدنا روح الدعابة

والحقيقة أن هذه لم تكن المرة الأولى التى يسئ فيها ساويرس للاسلام فقبل ذلك اساء للحجاب

وللمادة الثانية من الدستور والكثير والكثير

ولكن اليوم كانت هناك ردوداقوية

منها  رد المذيع وسام عبد الوارث فى برنامج مصر الحرة فى قناة الحكمة ورد الشيخ الفاضل محمد عبدالمقصود

واطلقت القناة حملة ضد ساويرس بمقاطعته وكل شركاته

وبادرت القناة بوقف الاتصالات والرسائل من كل خطوط موبينيل

يمكن مشاهدة هذا الفيديو

كذلك كان هناك ردا آخر حيث أَنشأت صفحة على الفيسبوك بعنوان “احناكمان بنهزر يا ساويرس”

وطلبت الصفحة من كل من يمتلك خط موبينيل ان يكسره ويرفع الصورة

وبالفعل شارك العشرات فى تكسير شرائحهم والتعليق الساخر عليها كرد فعل لما فعله ساويرس

صورة لشريحة موبنيل من صندوق القمامة

تكسير يو اس بى موبينيل

لمزيد من الصور الشرائح المكسرة زورالصفحة

http://www.facebook.com/boycott.sawiris

خسوف القمر غدا الأربعاء

السلام عليكم ورحمة الله وبركاته

بسم الله الرحمن الرحيم

“لا الشمس ينبغي لها أن تدرك القمر ولا الليل سابق النهار وكل في فلك يسبحون “

بكرة ان شاء الله فى خسوف قمر كلى فى معظم الدول العربية

هيكون حوالى الساعة 8 بالليل وهيستمر لحوالى 9 يعنى تقريبا ساعة

الخسوف بيبقى فى عظة وتذكير بالموت والآخرة والرسول عليه الصلاة والسلام أحث على صلاة الخسوف

وفيها أحاديث كتير صحيحة منها

عَنْ ابْنِ عُمَرَ رَضِيَ اللَّهُ عَنْهُمَا أَنَّهُ كَانَ يُخْبِرُ عَنْ النَّبيِّ صَلَّى اللَّهُ عَلَيْهِ وَسَلَّمَ

“إِنَّ الشَّمْسَ وَالْقَمَرَ لَا يَخْسِفَانِ لِمَوْتِ أَحَدٍ وَلَا لِحَيَاتِهِ

وَلَكِنَّهُمَا آيَتَانِ مِنْ آيَاتِ اللَّهِ فَإِذَا رَأَيْتُمُوهَا فَصَلُّوا”

رواه البخاري (1402) ومسلم (914).

عن الْمُغِيرَةَ بْنَ شُعْبَةَ قال: انْكَسَفَتْ الشَّمْسُ يَوْمَ مَاتَ إِبْرَاهِيمُ فَقَالَ النَّاس

انْكَسَفَتْ لِمَوْتِ إِبْرَاهِيمَ فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ :

“إِنَّ الشَّمْسَ وَالْقَمَرَ آيَتَانِ مِنْ آيَاتِ اللَّهِ لَا يَنْكَسِفَانِ لِمَوْتِ أَحَدٍ وَلَا لِحَيَاتِهِ فَإِذَا رَأَيْتُمُوهُمَا فَادْعُوا اللَّهَ وَصَلُّوا حَتَّى يَنْجَلِيَ” .

رواه البخاري (1061) ومسلم (915).

وفى أحاديث تانية كتير

منها اللى بيحث على الصلاة وعلى الدعاء وعلى الصدقة وعلى الذكر والاستغفار ولعى التعوذ من القبر

—————-

صلاة الخسوف بتبقى ركعتين جهريتين وفى كل ركعة قراءتان وركوعان وسجودان

وفى من العلماء ومنهم ابن القيم من يقول بوجوبها لفزع النبى صلى الله عليه وسلم عندما رأى الخسوف وذهب ليلصلى ونادى مناد أن الصلاة الجامعة

ومنهم من يقول بأنها سنة

والله أعلم

عَنْ عَائِشَةَ رَضِيَ اللَّهُ عَنْهَا أَنَّ يَهُودِيَّةً …. فَكَسَفَتْ الشَّمْسُ

فَرَجَعَ ضُحًى فَمَرَّ رَسُولُ اللَّهِ صَلَّى اللَّهُ عَلَيْهِ وَسَلَّمَ بَيْنَ ظَهْرَانَيْ الْحُجَرِ

ثُمَّ قَامَ فَصَلَّى وَقَامَ النَّاس وَرَاءَهُ فَقَامَ قِيَامًا طَوِيلًا ثُمَّ رَكَعَ رُكُوعًا طَوِيلًا

ثُمَّ رَفَعَ فَقَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ

ثُمَّ رَفَعَ فَسَجَدَ سُجُودًا طَوِيلًا ثُمَّ قَامَ فَقَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ

ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ ثُمَّ قَامَ قِيَامًا طَوِيلًا وَهُوَ دُونَ الْقِيَامِ الْأَوَّلِ

ثُمَّ رَكَعَ رُكُوعًا طَوِيلًا وَهُوَ دُونَ الرُّكُوعِ الْأَوَّلِ ثُمَّ سَجَدَ وَهُوَ دُونَ السُّجُودِ الْأَوَّلِ ثُمَّ انْصَرَفَ” .

متفق عليه – وقد سبق قريباً -.

صفة صلاة الخسوف كما يلي :

ركعتان بأربع ركوعات وأربع سجدات ، يكبر فيقرأ الفاتحة وسورة طويلة ، ثم يركع ركوعاً طويلاً بقدر القراءة ، ثم يرفع ويقول سمع الله لمن حمده ، ربنا ولك الحمد ، ثم يقرأ الفاتحة وسورة طويلة أقصر من التي قبلها ، ثم يركع ركوعاً طويلاً أقصر من الذي قبله ، ثم يرفع قائلاً سمع الله لمن حمده ، ربنا ولك الحمد ، ثم يسجد سجدتين طويلتين بقدر القراءة ، الأولى منهما أطول من التي تليها ، ثم يصلي الركعة الثانية كالأولى ولكن دونها في كل ما يفعل ، دفعاً للحرج والمشقة على الناس ، ومنعاً للضجر والسآمة ، لأن المصلي حينما يدخل الصلاة يكون على قدر كبير من النشاط فما يلبث أن يضمحل هذا النشاط شيئاً فشيئاً ، فناسبذلك أن تكون الصلاة متفاوتة في الطول .

حاولو بقى متضيعوش ثوابها والعظة منها

واللينك ده فى تفصيل كامل عن صلاة الخسوف اللى يحب يعرف عنها معلومات اكتر ،، وايه اللى نقوله فى الركوع والسجود لان بنطول فيهم اوى ومعلومات كتير عن الصلاة وعن الخسوف

http://www.saaid.net/Doat/yahia/12.htm

اللهم احسن خواتيمنا وقنا عذاب النار يارب

سلام عليكم

جريدة اليوم الساقع … حسان: من يتهم المجلس العسكرى بالخيانة كالمرتد بعد وفاة الرسول

السلام عليكم ورحمة الله وبركاته

نشترت بالأمس جريدة اليوم السابع مقالا بعنوان

حسان: من يتهم المجلس العسكرى بالخيانة كالمرتد بعد وفاة الرسول

المقال انتشر جدا على الفيس وعلى تويتر

وطبعا المعظم بينتقد الشيخ جدااااا

الحق يقال ان العنوان مستفز جدا لأى حد يقرأه وانا شخصيا اتصدمت من العنوان واستغربت جدا

فدخلت قريت المقال كامل وقريت الجزء المتعلق بالمجلس العسكرى اكتر من مرة

لعل وعسى الاقى علاقة بين الكلمتين اللى اتقالوا عن المجلس على لسان الشيخ وبين عنوان المقال

لكن هيهات

دول الكلمتين اللى اتذكروا فى المقال عن المجلس

أما ثانى الأمور التى انتقدها حسان هم الذين اتهموا الجيش والمجلس الأعلى للقوات المسلحة بالتباطؤ والخيانة

والذين يريدون إشعال الفتنة الطائفية،

بالإضافة لإعلام الإثارة

وهم كذلك يلبسون الحق بالباطل والصدق بالكذب والخير بالضلال،

ممؤكدا أن الأمر يحتاج إلى بصيرة وعلم بحجم المؤامرة التى تدبر الآن على الإسلام ومصر،

المقال بطوله مفيهوش غير الجزء ده الوحيد المتعلق بالمجلس

اللى انا مش شايفة اى علاقة بينه وبين العنوان ابدا

انا مش هتكلم بقى عن اللى مكتوب فى الجزء ده ،، ده كلام الشيخ من وجهة نظره

انا بس عاوزة اقول ان مالوش علاقة بالعنوان خالص اللى خدع ناس كتير

اساسا يعنى معظم الناس مبتحبش اليوم السابع ومشهورة باسم ايوم الساقع بين الناس كلها

وكل الناس بتكدب اخبارها وتضليلها دايما ومش بيصدقوا اللى بيتقال عليها

لكن لما يتقال عليها حاجة ليها علاقة بالشيخ حسان او السلفيين

تبقى اليوم السابع زى الفل واصدق العنوان من غير ما اقرأ المقال وانا مغمض عنيا صح؟

مش طالبه من الناس غير انهم يقرأوا المقال كامل وميخدوش بالعنوان لان ليس له علاقة بكلام الشيخ اصلا

سلام عليكم

رسالة رقم 1 من المجلس الأعلى للقوات “الغيـــر” مسلحة

السلام عليكم ورحمة الله وبركاته

نبث إليكم الرسالة رقم 1 من المجلس الأعلى للقوات الغير مسلحة

 

Done By Me “Hend Gabr”

بعبع السلفين بعد الاستفتاء

السلام عليكم ورحمة الله وبركاته

امبارح كانت نتيجة الاستفتاء وكانت صوت الأغلبية بالموافقة بنسبة حاجة وسبعين فى المائة

بعد النتيجة بدأ الناس تتكلم عن اسباب علو صوت نعم وعن الفرق الرهيب بين الصوتين 14 مليون مصرى قصاد 4 مليون مصرى

فرق رهيب جدا مكانش حد متخيله تقريبا

كانت كل التوقعات ان احتمال كبير نعم تكسب لكن بفارق بسيط اوى

كان المعظم بيقول ان فرق الاصوات هيكون بسيط جدا بين الصوتين

امبارح الكل استغرب جدا واتفاجئ بالنتيجة وبدأ كلام كتير يتقال

اتهامات مالهاش اول من آخر للاخوان والسلفيين وكل من قالو نعم ونادوا بيها

الناس فى كل حتة فى الفيس وتويتر وفى الاعلام بيتكلمو عن الدين والسياسة وفصل الدين عن السياسة واستخدام فزاعة الدين

انا خلاص مخى ضرب ومبقتش فاهمة حاجة بس هحاول اجمع كل قواى واقول الكلام اللى فهمته ويارب اقدر اطلع وجهة نظرى

مهاجمة فظيعة جدا على اهل الدين وانهم استخدموا الدين فى الدعاية وهذا غير مقبول ابدا وان دى جريمة

اولا انا محبش ابدا ابدا اخلط الاخوان بالسلفيين ولا شايفة ان فى تشابه بينهم خالص مع احترامى للطرفين

لو رجعنا لورا شوية قبل الاستفتاء كان الاخوان بيتكلمو فى كل القنوات واعلنوا رأيهم انهم هيقولو نعم ،، لو افتكرنا الاسباب اللى قالولها لنعم مش هلاقى حد فيهم جاب سيرة المادة التانية ومش فاكرة ان حد فيهم اتكلم عن اى حاجة تخص الدين ،، الناس اتكلمت عادى جدا وقالوا وجهة نظرهم فى نعم ولا حد جاب سيرة دولة اسلامية ،، على الاقل كل اللى سمعتهم

الشيوخ والسلفيين لما اتكلموا وعرضوا وجهات نظرهم فى قولهم نعم ،، اولا هما قالو انهم اجتمعو وقعدو مع عدد كبير من السياسين والخبراء الدستوريين وفى الآخر اجتمعو على قول نعم

الناس دى طلعت وكل واحد فيهم اتكلم ،، برضه على الأقل اللى سمعتهم ،، وضح وجهة نظره وان هو بيقول نعم عشان الجيش يرجع مكانه حتى كلمة الشيخ محمد حسان اللى كل ماسكها الجيش يعود لسكناته ،، وعشان نعمل انتخابات سريعة ولان البلد فى حالة فوضى وعدم استقرار وكلام كتير

نيجى بقى لحتة الدين : دلوقتى الناس الأفاضل دى شافوا ان فى هجوم على الدين من بعض الطوائف وان فى ناس عاوزين مصر مش دولة اسلامية وخافو على البلد ان تحصل فيها فتنة او حاجة تضر الدين ومن المنطلق ده هما شافو ان كلمة نعم هتحافظ على الدين وهتمنع الفتنة

بكرر دى ناس افاضل وكبار علماء الأمة اللى ليهم كل احترام واللى حسوا ان فى خطر على الدين ،، وشئ طبيعى جدااااا ان الداعية يبعد الأمة عن الفتنة ،، وهما شافوا ان ده فى قولة نعم

لكن والله ما سمعت ولا واحد منهم قال ان اللى هيقول لا حرام ولا التريفة والكلام السخبف اللى طالع

بغض النظر عن كل ده : دلوقتى انا اشكك فى نزاهة واحد وفى كلامه لما اعرف ان هو ليه غرض من ورا الكلام ده

يعنى مثلا لو هو بيطمع فى منصب معين او حاجة زى كده

لكن على العكس تماااااااماااااااا والله ،، كل الشيوخ اللى اتكلموا فى الموضوع قالو ان احنا مش عاوزين مناصب سياسية وان احنا خدم لدين الله واحنا دعاة إلى الله وهنفضل دعاة ومش هنتغير

انا مش عارفة ازاى اعتب على شيخ وداعية اسلامى بيغير على دينه وده اصلا وااااااااااااااااااااااااااجبه

 

الطرف الآخر بقى المعارض لكلامهم

ليه وليه يدخلوا الدين فى الموضوع ،، الدين مالوش دعوة بالسياسة احنا بنتكلم فى دستور نقول نعم ونقول لا من غير ما ندخل الدين

يعنى ايه اصلا استخدموا الدين عشان يضغطوا على الناس تقول نعم ؟؟؟ هو الدين ده هيديهم كل واحد مقابل مادى ،، هما يعنى هياخدوا الف جنيه على كل صوت بنعم ؟

فكر كده شوية الناس دى كسبانة ايه لو النتيجة كانت طلعت 100% نعم ؟؟؟؟ ايه مكاسبهم ؟؟؟؟ وكانوا هيخسروا ايه لو النتيجة طلعة 100% لا ؟؟؟

انا شايفة الناس متكلمتش غير من منطلق ومن دافع الخوف على الاسلام وان ده واجبهم توعية الناس لنقطة مهمة جايز مش واخدين بالهم منها

فى المقابل ليه زعلانين من الناس دى انهم قالو قولو نعم

طب ما اللى كانوا عاوزين الناس تقول لا طلعو قالو للناس قولو لا

فى الناحيتين احنا كنا محتاجين نوعى الناس اكتر من نقول قولوا لا او قولو نعم

مينفعش نعتب عليهم انهم قالو قولو نعم وفى المقابل فى ناس قالت قولو لا وقالوها صريحة جدا زى ما دول برضه قالوها صريحة جدا

زعلانة جداااااا من الهجوم الفظيع على الشيوخ ودمى بيتحرق جدا لما حد بيغلط فيهم

يعنى وصلت لشتايم وسب علنى للشيوخ

للأسف لو هى دى الديمقراطية اللى كنا بننادى فيها ،، يبقى طظ فيها لو ده مفهومها عندكو

على الأقل يا أخى اعترض معاه باحترام واحفظ مكانته

الشيوخ دول مشوهوش صورة الدين ولا استغلوا الدين عشان يروجو لسلعة ،، الناس دى ناس محترمة محركهمش غير خوفهم على الدين وعلى الوطن

ناس كتير اوى احترمت جدا ارائهم وتفكيرهم فى الفترة اللى فاتت بس كرهت نقدهم للشيوخ بعد النتيجة وتطاولهم

لو انتو شايفين ان الناس دى فاهمين الدين غلط ،، بالعقال كده هيبقى كل كل كل علماء مصر اللى موجودين فى الفترة دى فاهمين الدين غلط ؟؟ امال مين اللى فاهمه صح ؟؟؟؟؟؟؟؟

على فكرة انا قولت لأ فى الاستفتاء ،، بس مش معنى كده انى غلطت كل الناس المحترمة دى

ومش هتكلم عن الاخوان ،، بس ياريت اللى يتكلم يفصل بينهم

 

اعذرونى ان الموضوع مش مرتب وسايح على بعضه

وياريت تعرف يعنى ايه سب عالم او رجل دين قبل ما تفكر تقول عليه اى كلمة او تغلط فيه

سلام عليكم

استفتاء التعديلات الدستورية

بسم الله الرحمن الرحيم

السلام عليكم ورحمة الله وبركاته

 

يوم السبت القادم ان شاء الله بتاريخ 19-3-2011 هو يوم الاستفتاء على التعديلات الدستورية

التعديلات الدستورية عبارة عن تعديل 8 مواد تقريبا فى الدستور القديم

الاستفتاء سيكون بنعم على جميع التعديلات أو لا على جميع التعديلات

لماذا نعم ؟ ولماذا لا ؟

سأطرح الرأيين ووجهتى النظر

أولا الاستفتاء بـ نعم

سأطرح وجهات النظر من المقالات والآراء التى قرأتها

الجهات التى أعلنت انها توافق على التعديلات الدستورية هم :- الاخوان المسلمين – مجلس شورى العلماء – الحزب الوطنى

وبالطبع هناك آخرين موافقون على التعديلات ليسو من هذه الجهات

سأتحدث عن وجهة نظرهم بصورة عامة

من يقول نعم للاستفتاء يرى

اننا لا بد أن نسرع فى انهاء هذه الفترة الانتقالية بأقصى سرعة وذلك بالموافقة على التعديلات حتى نقوم بعمل الانتخابات البرلمانية ثم الرئاسية

وذلك لعودة القوات المسلحة إلى أماكنها وتولية البلاد للرئيس القادم والحكومة القادمة حتى نحصل على الاستقرار

وذلك خوفا من جلوس الجيش مدة أطول من ستة أشهر فى البلاد

وكذلك هم يرون التعديلات كافية وان هذه هى كانت مطالب الشعب وأنه تم تعديل المواد التى كانت تغضب الشعب

لم لا وقد تحددت مدة الرئيس بأربع سنوات والتجديد مرة واحدة فقط ، واصبح لازما عليه تعيين نائبا له حتى لا يكون هو الآمر الناهى وحده

وكذلك الاشراف القضائى على الانتخابات حتى نضمن نزاهتها

والمادة الأهم وهى المادة 189 مكرر التى تلزم اول مجلس شعب وشورى قادمين بتشكيل لجنة لانشاء دستور جديد

فلم لا نحصل على الاستقرار فى هذه الفترة ثم بعد ذلك ستتحقق مطالبنا بانشاء دستور جديد يرتاح له الجميع

كذلك يقولون بأننا من سنختار الرئيس القادم ومجلسى الشعب والشورى من خلال انتخابات نزيهة فلنثق فى دستورهم الجديد لاننا من اخترناهم ولأن من سيأتى بعد ذلك سيفكر ألف مرة فى كل خطوة وسيضع الثورة امام عينيه

ويقولون أن دستورا جديدا يستغرق وقتا طويلا جدا معنى ذلك استمرار حالة الفوضى وعد الاستقرار مدة اطول

فهم يريدون الاستقرار والعودة للوضع الطبيعى لعودة الاقتصاد وغير ذلك ……

اعتقد أن هذه معظم آراء من سيصوتون بنعم

لكن هناك نقطة اضافية لمجلس شورى العلماء وهى :- الموافقة على التعديلات الدستورية طالما لم تمس المادة الثانية من الدستور وأن مصر ستظل دولة اسلامية

وأننا لا نضمن إذا قمنا بعمل دستور جديد فى هذه الفترة فى ظل الفتنة الطائفية القائمة عدم مساس المادة الثانية

ويرون أن إيجابيات التعديل أكثر من سلبياته

فهذا رأى علماء الأمة الأفاضل

————————————-

ثانيا من يقولو لا

يسمون هذه التعديلات “ترقيع” للدستور ونحن لا نقبل بذلك

نحن نريد دستورا جديدا لا دستورا معدلا

هذا الدستور المعدل هو سيظل دستور مبارك ،، فليس معنى تغيير 8 مواد ان الدستور تغير

الثورة قامت لاسقاط النظام بالكامل فهى ثورة وليست مظاهره

المظاهره هى التى تعدل على الدستور ولكن الثورة تسقط الدستور

إذا قولنا نعم للتعديلات فستأتى بعدها الانتخابات البرلمانية والقوى السياسية الجاهزة لذلك الآن هم الاخوان المسلمين والحزب الوطنى فقط

أين حق من قاموا بالثورة وأسقطوا النظام فى الانتخابات

يرون أن نقول لا حتى لا نسرع فى الانتخابات ،، ونعطى الحق لمن اسقطو النظام وللأجزاب الأخرى الحق فى الوقوف على أرجلهم والاستعداد

وإذا قلنا نعم للتعديلات فعلى أى أساس ستقوم الانتخابات البرلمانية القادمة ؟؟ ستقوم على مواد دستور 71 الذى اسقطناه بالثورة ؟؟؟

فالمواد التى تغيرت غير كافية وهى ليست كل المواد الخاصة بالانتخابات البرلمانية

فهناك مواد نحن غير موافقون عليها لم تتغير وستقوم الانتخابات البرلمانية على اساسها

وردو على المؤدين حتى نحصل على الاستقرار فى البلاد والانتقال إلى حكم مدنى ،، يرون عمل دستور اعلانى وتشكيل حكومة انتقالية مؤقتة حتى تمر هذه الفترة وننتهى من تكوين الدستور ثم الانتخابات البرلمانية والرئاسية بعد ذلك

فكيف تكون الانتخابات اولا ثم الدستور الجديد بعد ذلك ؟؟

ويقول بعضهم ان المادة 189 مكرر غير ملزمة لعمل دستور جديد فهناك شروط اولية قبل الموافقة على عمل دستور جديد ،، وأن هذه المادة غير مفهومة بشكل صحيح وبها تلاعب

وكذلك البعض غير موافق على المادة التى تقول بأن الرئيس لا يكون متزوجا من غير اجنبيه

———————————

هذا ما أتذكره مما قرأت وسمعت عن الرأى الموافق والرأى المعارض للتعديلات

أما عنى أنا فحتى الآن أنا مقتنعة بالرأى المعارض للتعديلات الدستورية

فلم نعدل فى دستور قد اسقطته الثورة بالفعل

أرى أن حقنا لدماء الشهداء والجرحى ولإحقاقا لحقهم وبما ثاروا من أجله أن لا نوافق على تلك التعديلات

أرى أن من حقنا على أهالى الشهداء عدم الموافقة على التعديلات الحالية

كيف أوافق على دستور يختلف كبار السياسين فى فهمه فبعضهم يقول انها مادة ملزمة بعمل دستور جديد والبعض الآخر يقول غير ملزمة

يطلبون من الشعب الذى يوجد بيه الكثير من الغير واعيين سياسيا بقدر كافى من الاستفتاء على الدستور مختلف فى فهم مواده !!!!!!

البعض يقول ان الموافقة على التعديلات تعنى بقاء بقية مواد الدستور القديم الغير معدلة والبعض الآخر يقول نحن موافقون على التعديلات وليس معنى ذلك الموافقة على بقيت المواد

!!!!!!!!!!!!!!

بالنسبة للمادة التانية وأننا نوافق لأن المادة الثانية لم تمس

ففى الأساس الموافقة على التعديلات تعنى الموافقة على عمل دستور جديد لاحقا

فالذى يضمن لنا أن المادة لن تتغير بعد ذلك يضمن لنا أنها لن تتغير فى الدستور الجديد الحالى أيضا

هذه أسبابى للرفض

سبب واحد من اسباب الموافقة وهو اتباع رأى علماء وأفاضل الأمة وهو سبب مخاوفى من الرفض

إلى الآن لم أحدد بعد هل سأصوت بنعم أم بلا

الله أرنا الحق حقا وارزقنا اتباعه وأرنا الباطل باطلا وارزقنا اجتنابه

 

بالطبع سقط منى بعض وجهات النظر من الطرفين واحتمال كبير أكون أخطأت فى بعض النقاط أو لم أصلها بالطريقة الصحيحة ،، لكن هذا ما أتذكره

كتر خيرى ده انا مكانش ليا فى السياسة ولا البطيخ خالص

اللى يدخل الموضوع بقى يبقى يدخل على اللينك ده

http://www.facebook.com/event.php?eid=206046636072973&index=1

 

سلام عليكم