حددت هدفك ولا لسه ؟

السلام عليكم ورحمة الله وبركاته

اهلا بيكوا وحلقة جديدة من برنامج

حوار هندي

أهلا بكل زوار وقراء الحوار

وحشتونا بعد غياب فترة طويلة عنكوا

بغض النظر عن ان في ناس كانت شافت الموضوع ده قبل كده في الريدر

انا لما مسحته كنت ناوية احطه تاني يوم

بس من ساعتها وانا مش عارفة احطه تاني

يللا حصل خير

.

.

.

هنتكلم في حلقتنا النهاردة عن الأهداف

معظم الناس بتبقى عايشة حياتها عادي وبتقضي اليوم بيومه وخلاص

بس في الغالب بيجي عليك وقت كده تحس ان انت عايش من غير هدف

هتسمع مثلا حوار او هتقرأ مقالة في جرنان في مجلة ع النت في أي مكان عن تحديد الأهداف

هتبدأ تبص لحايتك بمنظار مختلف وتبدأ تفكر انا ايه هدفي في الحياة

هترتب أولوياتك وتحاول تحط هدف لنفسك عشان تسعى وتحققه

ممكن يكون هدف كبير وواضح وهيندرج تحتيه كل حاجة في حياتك وهتقضي حياتك كلها عشان توصل للهدف ده

وممكن يكون كذا هدف مختلفين بس طبعا مش متعارضين

في الغالب بيكون هدف واحد وهو أهم حاجة في حياتك انت عاوز توصلها ويكون هدف طويل الأجل

بس في نفس الوقت عشان توصله في اهداف صغيرة بتحققها عشان توصل للهدف الكبير

الاهداف الصغيرة بيبقى ليها وقت محدد كل فترة بتنجز هدف معين في سبيل الوصول للهدف الكبير

ولازم تكون عارف ان اهدافك هتقدر توصلها من غير ما تخالف مبادئك

متختارش هدف عشان توصله هتستغنى عن مبدأ من مبادئ حياتك في سبيل الوصول للهدف

وفي الآخر تقول المهم اني وصلت لهدفي

ده كده يبقى هدف فاشل

لازم تختار هدفك صح

لازم تقرأ وتسمع كلام الناس الدارسة والواعية وتعرف ازاي تحدد هدفك اللي هتمشي عليه طووووول حياتك

.

.

.

دي كانت مقدمة لحلقة النهاردة

ومع فاصل اعلاني قصير

نراكم بعد الفاصل

.

.

اهلا بيكوا مرة تانية

نقطة النقاش بقى

حددت هدفك في الحياة ولا لسة ؟

طب لو حددته حصل امتى وليه وكان ايه سبب تفكيرك في تحديد هدف ومين كان السبب ؟

طب الهدف ده حددته على اساس ايه وهتوصله امتى ؟

لما تحقق هدفك هيحصل ايه ؟ ايه شعورك وقتها

طب لو محدتتش هدفك لسه مستني ايه ؟ هتحدده امتى ؟ ولا انت اصلا مش عاوز تحدده ؟ انت عاوز تعيش كده وخلاص

واهي الدنيا ماشية ومش هتقف ؟

طب الناس اللي حددت هدفها كاتبينه ولا هو معروف وخلاص

بتكتب هدفك قدامك وتبص عليه دايما عشان تفكر نفسك بيه وبتعمل خطوات الوصول للهدف وتكتبها

ولا انت هدفك في راسك وعارف انت وصلت لايه ولسه عاوز توصل لايه

حاسس ان انت هتوصل لهدفك ولا انت اختارت هدف مستحيل صعب الوصول ليه بس انت عايش بمبدأ مفيش مستحيل

ولا لما اخترت هدف درست كل الطرق كويس ودرست امكانياتك واختارت هدف على اساس امكانياتك

حاسس بفرق أو حاسس بتغيير بعد ما حددت هدفك

كنت عايش ازاي قبله وبقيت عامل ازاي بعده

لو انت شايف حد اصغر منك او بتتناقش مع حد هو شايف ان تحديد الهدف حاجة مالهاش لازمة

هتقوله ايه وازاي تقنعه وتفيده بتجربتك  ؟

لو اقتنع بكلامك هتقوله يبدأ ازاي ويحدد هدفه على اساس ايه ويسعى لتحقيقه ازاي ؟

تساؤلات كتير في الموضوع

منتظرة  آرائكوا ومشاركاتكوا

كل واحد يسمك المايك ويقول كل اللي نفسه فيه وكلنا آذان صاغية لحضراتكم

أو ممكن نقول كل واحد يمسك كيبورده ويكتب كل اللي نفسه فيه وكلنا عيون متأملة

سلام عليكم